కన్నులకు చూపందం

కన్నులకు చూపందం
కవితలకు ఊహందం
తీగకే పూలందం
వారికే నేనందం

||కన్నులకు||

వానాగిపోయినను ఆకుపై చుక్కందం
అల చెదిరిపోయిననూ దరి నున్న నురుగందం
చిన్నారి తారకలే రాతిరికి ఓ అందం
చిన్నారి తారకలే రాతిరికి ఓ అందం
శ్రీవారి చూపులకు ఎప్పుడు నేనందం

||కన్నులకు||

అందాల వన్నెలకే అపురూప కురులందం
అనురాగ ముద్దరలే చెరిగిన బొట్టందం
మగువ లో ప్రేమొస్తే మనుగడే ఓ అందం
మగువ లో ప్రేమొస్తే మనుగడే ఓ అందం
నా తోడు నీ వుంటే చీకటే ఓ అందం

||కన్నులకు||